[English language version here]
Tá Conor D. McGuinness TD, urlabhraí Shinn Féin ar Ghnóthaí Tuaithe, Forbairt Pobail agus an Ghaeltacht, tar éis fáilte a chur roimh an bhfógra ó Údarás na Gaeltachta inné go mbeidh maoiniú á chur ar fáil chun foireann deartha a cheapadh d’Ionad Fiontraíochta nua i nGaeltacht na Rinne.
Ag labhairt dó, dúirt an Teachta:
“Is céim dhearfach chun cinn í an infheistíocht seo ó Údarás na Gaeltachta. Tá tábhacht mhór leis an tacaíocht seo do chruthú post agus d’fhás eacnamaíoch i nGaeltacht na Rinne. Tá pobail Ghaeltachta mar seo lán d’acmhainn agus de chumhacht, agus ní mór dóibh a bheith tacaíochta go leanúnach.
“Ba mhaith liom freisin Comhlucht Forbartha na nDéise a mholadh as an obair iontach atá déanta acu ag cur an tionscadail seo chun cinn. Bhí an deis agam féin obair a dhéanamh leis an eagraíocht seo mar Oifigeach Pleanála Teanga do Ghaeltacht na nDéise, agus tá a fhios agam ón taithí phearsanta an díograis agus an tiomantas atá acu i leith fhorbairt agus athneartú a bpobail.”
Chuir Teachta McGuinness béim, áfach, ar na dúshláin mhóra atá fós roimh an nGaeltacht agus ar na teipeanna Rialtais atá ag cur bac ar fhorbairt:
“Níl forbairt eacnamaíoch ina haonar sách le todhchaí na Gaeltachta a chosaint. Tá géarghá le hinfheistíocht i dtithíocht shóisialta, tithíocht inacmhainne agus i láithreáin seirbhíseacha i gceantair Ghaeltachta. Chomh maith leis sin, tá moill nach féidir a chosaint fós ar fhoilsiú na dTreoirlínte Pleanála don Ghaeltacht. Gan straitéis shoiléir pleanála agus soláthar cuí tithíochta, beidh sé dodhéanta do dhaoine óga fanacht ina bpobail dhúchais agus a gclanna a thógáil.”
Thug sé rabhadh soiléir faoi thodhchaí na Gaeltachta:
“Tá an ghéarchéim tithíochta ina bagairt dhíreach ar inmharthanacht na Gaeltachta. Má leanann an scéal mar atá, beidh titim shuntasach ar líon na gcainteoirí dúchais agus ar phobal na Gaeilge sna ceantair seo. Ní féidir an Ghaeltacht a chosaint gan pobail bheo a choinneáil iontu.”
D’áitigh sé freisin ar an Rialtas infheistíocht a dhéanamh i seirbhísí poiblí:
“Ní mór do sheirbhísí riachtanacha, cosúil le hoifigí poist, cúram sláinte agus iompair phoiblí, a bheith láidir agus inrochtana i ngach ceantar Gaeltachta. Ní féidir forbairt a dhéanamh ar phobail gan bonneagar seirbhísí cuí.”
Ag deireadh a chuid ráiteas, cháin Teachta McGuinness an Rialtas go géar as deiseanna a chailliúint:
“Tá sé do-ghlactha gur dhiúltaigh an Rialtas glacadh le leasuithe Shinn Féin ar an mBille Údarás na Gaeltachta, moltaí a d’fhéadfadh bord Údarás níos daonlathaí agus níos cumhachtaí a chruthú chun dul i ngleic leis an ngéarchéim tithíochta sna Gaeltachtaí. Tá gá práinneach le cumhachtaí nua agus le pleanáil straitéiseach chun freastal ar riachtanais na bpobal Gaeltachta.
“Tacaíonn Sinn Féin leis na pobail Ghaeltachta, leis na teaghlaigh atá ag iarraidh cónaí, obair agus teanga a chaomhnú ina gceantair féin. Ní leor focail; tá gníomh fíor-riachtanach anois.”
Conor D. McGuinness TD 