Chuir Teachta Dála Shinn Féin do Phort Láirge, Conor D. McGuinness, fáilte roimh dhul chun cinn maidir le tithe sóisialta i nSean Phobal — ach thug sé rabhadh go gcaithfear na pleananna reatha a leasú chun freastal i gceart ar riachtanais teaghlach áitiúil agus phobal na Gaeltachta.
Dheimhnigh an Teachta McGuinness gur chuir sé féin agus an Comhairleoir Kate O’Mahoney aighneachtaí foirmiúla isteach mar chuid den chomhairliúchán poiblí deiridh ar an togra chun 12 theach sóisialta a fhorbairt i nGaeltacht Iarthar Phort Láirge. Dúirt sé gur céim dhearfach í an chomhairliúchán seo, ach go raibh an dul chun cinn go dtí seo “mall agus mí-éifeachtach”.
“Tá na tithe seo ag teastáil le fada. Tá cónaí orm féin i nGaeltacht na nDéise agus tuigim go maith an géarchéim tithíochta atá ag brú ar an bpobal seo. Is cúpla bliain ó shin a bhrúigh mé ar an gComhairle togra maoinithe a chur faoi bhráid na Roinne Tithíochta — céim a bhí riachtanach tar éis blianta fada d’éileamh áitiúil agus faillí pholaitiúil. Tá an dul chun cinn ó shin ró-mhall.”
“Is maith an rud é go bhfuil an pobal á chur san áireamh sa chéim seo — ach níl na pleananna reatha oiriúnach don fhíor-riachtanas. Tá sé beartaithe 12 theach dhá sheomra leapa a thógáil — ní leor sin. Tá teaghlach ar liostaí tithíochta a bhfuil trí agus ceithre sheomra leapa de dhíth orthu. Ní mór meascán ceart a bheith san fhorbairt.”
Chuir an Teachta McGuinness, atá ina Urlabhraí Shinn Féin ar Ghnóthaí Tuaithe, Forbairt Pobail agus an Ghaeltacht, béim freisin ar ról na tithíochta seo maidir le todhchaí na teanga agus na Gaeltachta.
“Is pobal Gaeltachta é Sean Phobal — agus tá todhchaí an phobail ag brath ar theaghlaigh óga a bheith in ann fanacht, obair agus a bpáistí a thógáil anseo. D’éirigh liom, nuair a bhí mé i mo Chomhairleoir, clásal cáilithe Gaeltachta a bhaint amach i scéim leithdháiltí tithíochta na Comhairle. Ní mór é sin a chur i bhfeidhm go foirmiúil anois trí Ordú ón bPríomhfheidhmeannach, le go rachaidh na tithe seo chuig daoine a bhfuil nasc láidir pearsanta agus cultúrtha acu leis an bpobal áitiúil.”
Thug an Comhairleoir Kate O’Mahoney, atá ina ball den Choiste Beartais Straitéisigh do Thithíocht, Pobail, Spórt agus Caithimh Aimsire, tacaíocht don ráiteas sin:
“Tá na tithe seo fíor-thabhachtach — ach caithfidh siad a bheith oiriúnach. Ní leor cur chuige amháin do chách. Tá gá le spás ag teaghlaigh chun fás, agus caithfidh tithe trí agus ceithre sheomra leapa a bheith mar chuid den scéim. Tá sé chomh tábhachtach céanna go mbeidh tithe inacmhainne agus láithreacha seirbhíse curtha ar fáil don phobal áitiúil amach anseo.”
Dúirt an bheirt Shinn Féin go gcaithfidh an Chomhairle an fhorbairt seo a réamhamharc agus í a chur i gcomhthéacs straitéis níos leithne a áiríonn tithe inacmhainne agus láithreacha seirbhíse don phobal.
Chuir an Teachta McGuinness críoch leis an ráiteas:
“Tá muintir Shean Phobal ag fanacht leis seo le fada. Caithfear na tithe seo a chur ar fáil gan a thuilleadh moille — ach caithfear iad a dhéanamh i gceart, agus ar bhealach a fhreastalaíonn ar riachtanais an phobail agus a thacaíonn leis an nGaeltacht.”
Conor D. McGuinness TD 